விழுப்புரம் மாவட்டம் சின்னசேலம் அருகே உள்ள சித்த மருத்துவ கல்லூரியில் படித்த மோனிஷா, பிரியங்கா, சரண்யா ஆகிய 3 மாணவிகள் கடந்த 24-ந் தேதி கல்லூரி எதிரே உள்ள கிணற்றில் பிணமாக மிதந்தனர். இது தொடர்பான வழக்கில் கல்லூரி தாளாளர் வாசுகி சென்னை தாம்பரம் குற்றவியல் நடுவர் கோர்ட்டில் 25-ந் தேதி சரண் அடைந்தார்.
பின்னர் புழல் சிறையில் அடைக்கப்பட்ட வாசுகியை நேற்று போலீசார் பலத்த பாதுகாப்புடன் கள்ளக்குறிச்சிக்கு அழைத்து சென்றனர். அங்கு நடுவர் நீதிமன்ற மாஜிஸ்திரேட்டு தமிழ்ச்செல்வி முன்பு வாசுகியை ஆஜர்படுத்தினர்.
இவ்வழக்கை விசாரித்த மாஜிஸ்திரேட்டு கடலூர் மத்திய சிறையில் வாசுகியை ஒரு நாள் அடைக்கவும், நாளை (அதாவது இன்று) மீண்டும் கோர்ட்டில் ஆஜர்படுத்தவும் உத்தரவிட்டார். இதையடுத்து, வாசுகியை போலீசார் கடலூர் மத்திய சிறையில் அடைத்தனர்.