ஏடன் வளைகுடாவில் (Gulf of Aden) டச்சு நாட்டுக் கொடியுடன் இயங்கிய சரக்குக் கப்பல் ஒன்று தாக்கப்பட்டதில் அதன் பணியாளர்கள் இருவர் காயமடைந்த நிலையில், அந்தக் கப்பல் தற்போது தீப்பிடித்து எரிந்துகொண்டிருப்பதாகவும், கட்டுப்பாடின்றி மிதந்து செல்வதாகவும் ஐரோப்பிய ஒன்றியத்தின் ‘ஆஸ்பைட்ஸ்’ (Aspides) என்ற இராணுவ கடல்சார் பணிக்குழு அறிவித்துள்ளது. செங்கடல் பிராந்தியத்தில் ஹூதி தாக்குதல்களுக்குப் பதிலளிக்கும் வகையில் இந்த ஐரோப்பிய ஒன்றியப் பணிக்குழு நிறுவப்பட்டது.
கப்பலில் இருந்த 19 பணியாளர்களும் ஹெலிகாப்டர் மூலம் மீட்கப்பட்டனர். அவர்களில் 18 பேர் தற்போது ஐரோப்பிய ஒன்றியத்தின் கடற்படைக் கப்பல்களில் உள்ளனர் என்று ஆஸ்பைட்ஸ் பணிக்குழு ஓர் அறிக்கையில் தெரிவித்துள்ளது.
- தாக்குதலில் காயமடைந்தவர்களில் ஒருவர் சீரான நிலையில் உள்ளார்.
- மற்றொருவர் கடுமையாகக் காயமடைந்துள்ளார், அவருக்கு மருத்துவ சிகிச்சை அளிப்பதற்காக அருகிலுள்ள கிழக்கு ஆப்பிரிக்க நாடான ஜிபூட்டிக்கு (Djibouti) மாற்றப்பட்டுள்ளார்.
- மீட்கப்பட்ட பணியாளர்கள் ரஷ்யா, உக்ரைன், பிலிப்பைன்ஸ் மற்றும் இலங்கை ஆகிய நாடுகளைச் சேர்ந்தவர்கள் என்றும் அந்தப் பணிக்குழு தெரிவித்துள்ளது.
ஏடன் வளைகுடாவில் உள்ள இந்த டச்சு சரக்குக் கப்பல் மீது வெடிகுண்டு சாதனத்தைக் கொண்டு நடத்தப்பட்ட இந்தத் தாக்குதலை நடத்தியவர்கள் ஹூதி போராளிகள்தானா என்பது உடனடியாகத் தெளிவாகத் தெரியவில்லை என்று ராய்ட்டர்ஸ் செய்தி நிறுவனம் தெரிவித்தது.
தாக்குதலுக்கு உள்ளான எம்.வி. மினர்வாகிராச்ட் (MV Minervagracht) கப்பல் “தற்போது கடலில் கப்பல் போக்குவரத்துக்கு ஆபத்தை விளைவிக்கும் ஒரு தடையாக உள்ளது. எனவே, அப்பகுதியில் உள்ள அனைவரும் எச்சரிக்கையுடன் செயல்படுவது அவசியம்” என்று ஆஸ்பைட்ஸ் பணிக்குழு மேலும் எச்சரித்துள்ளது.
இந்தத் தாக்குதலை ஹூதி அமைப்பினர் உரிமை கோரினால், செப்டம்பர் 1 ஆம் தேதி சவூதி அரேபியாவின் செங்கடல் துறைமுக நகரமான யன்பு அருகே இஸ்ரேலிய உரிமையாளருக்குச் சொந்தமான ஸ்கார்லெட் ரே (Scarlet Ray) என்ற டேங்கர் கப்பலைத் தாக்கிய பின்னர், வர்த்தகக் கப்பல் மீது ஹூதி அமைப்பு நடத்தும் முதல் தாக்குதலாக இது இருக்கும் என்று ராய்ட்டர்ஸ் கூறியது.
