அமெரிக்க ஜனாதிபதி டொனால்ட் டிரம்ப் அறிவித்ததின்படி, இஸ்ரேல் மற்றும் ஹமாஸ் ஆகியவை காசா பிராந்தியத்துக்கான அமைதி திட்டத்தின் முதல் கட்ட ஒப்பந்தத்தில் கையொப்பமிட்டுள்ளன.
இதனால் அனைத்து சிறைப்பிடிக்கப்பட்டோர் விரைவில் விடுவிக்கப்படுவார்கள், மேலும் இஸ்ரேல் தமது படைகளை ஒப்பந்தத்தில் குறிப்பிடப்பட்ட வரம்பிற்குள் பின்வாங்கும். இது வலுவான, நீடித்த, நிலையான அமைதிக்கான முதல் படி என டிரம்ப் தெரிவித்துள்ளார்.
இந்த அறிவிப்பு எகிப்தில் நடைபெற்ற மூன்று நாட்கள் நீடித்த மறைமுக பேச்சுவார்த்தைகளுக்குப் பிந்தையதாகும். இதில் எகிப்து, கத்தார், துருக்கி மற்றும் அமெரிக்க அதிகாரிகள் மத்தியஸ்தராக பணியாற்றினர்.
இஸ்ரேலும் ஹமாஸும் ஒப்பந்தம் எட்டப்பட்டுள்ளதாக தனித்தனியாக உறுதிப்படுத்தியுள்ளன.
இஸ்ரேல் பிரதமர் பெஞ்சமின் நெதன்யாஹு, “இது ஒரு சிறந்த நாள்” எனக் குறிப்பிட்டு, நாளை அரசாங்கக் கூட்டம் கூடி ஒப்பந்தத்தை அங்கீகரித்து, அனைத்து சிறைப்பிடிக்கப்பட்டவர்களையும் வீடு திரும்பச் செய்வோம் என தெரிவித்துள்ளார்.
டிரம்ப் மற்றும் நெதன்யாஹு இடையே நடைபெற்ற தொலைபேசி உரையாடல் “வரலாற்றுச் சிறப்புமிக்க” ஒன்றாக இருந்ததாகவும், இருவரும் இந்த ஒப்பந்தத்துக்காக ஒருவருக்கொருவர் வாழ்த்து தெரிவித்ததாகவும் இஸ்ரேல் பிரதமர் அலுவலகம் தெரிவித்துள்ளது.
இந்த நிமிடத்தில், சிறைக்கைதிகள் மற்றும் அவர்களின் குடும்பங்களுடன் இஸ்ரேலின் இதயம் ஒன்றுபட்டிருக்கிறது என இஸ்ரேல் ஜனாதிபதி ஐசக் ஹெர்சாக் தெரிவித்துள்ளார்.
ஹமாஸ் தரப்பில் வெளியிடப்பட்ட அறிக்கையில், இஸ்ரேல் காசாவிலிருந்து பின்வாங்குதல், சிறைகைதிகள் பரிமாற்றம், மற்றும் மனிதாபிமான உதவிகள் அனுமதி ஆகியவை ஒப்பந்தத்தில் அடங்கியுள்ளதாகவும், “இந்த போருக்கு முற்றுப்புள்ளி வைக்க முயற்சிக்கும் அமெரிக்க ஜனாதிபதி டொனால்ட் டிரம்ப் அவர்களின் பங்களிப்பை மதிக்கிறோம்” என்றும் கூறப்பட்டுள்ளது.
மேலும், ஒப்பந்தத்தின் அனைத்து விதிமுறைகளும் முழுமையாக நடைமுறைப்படுத்தப்படுவதற்காக, அமெரிக்கா மற்றும் அரபு நாடுகள் இஸ்ரேலை உறுதியாகக் கட்டாயப்படுத்த வேண்டும் என ஹமாஸ் வலியுறுத்தியுள்ளது.
சிறைக்கைதிகள் விடுதலை திங்கட்கிழமை தொடங்கும் என நாங்கள் எதிர்பார்க்கிறோம்; இதை டிரம்ப் பின்னர் உறுதிப்படுத்தியுள்ளார் என வெள்ளை மாளிகையின் மூத்த அதிகாரி ஒருவர் தெரிவித்துள்ளார்.
ஒப்பந்தத்தின் முதல் ஐந்து நாட்களில், இஸ்ரேல் தினசரி 400 உதவி லாரிகளை காசாவுக்குள் அனுமதிக்கும், பின்னர் அந்த எண்ணிக்கை அதிகரிக்கும் எனவும் கூறப்பட்டுள்ளது.
“இந்த ஒப்பந்தத்தை முழுமையாக அமல்படுத்த ஐ.நா. முழு ஆதரவு வழங்கும்; நிலையான மனிதாபிமான உதவிகளை அதிகரிப்போம்” என ஐக்கிய நாடுகள் பொதுச் செயலாளர் அன்டோனியோ குட்டெரெஸ் தனது X பதிவில், தெரிவித்துள்ளார்
