ரஷ்ய குடியிருப்பு கட்டிடங்கள் மீது உக்ரைன் சரமாரி ட்ரோன் தாக்குதல்: பற்றி எரிந்த வாகனங்கள் - குழந்தைகள் உட்பட பலர் படுகாயம்!
உக்ரைன் மற்றும் ரஷ்யா இடையிலான போர் நாளுக்கு நாள் தீவிரமடைந்து வரும் நிலையில், ரஷ்யாவின் தெற்குப் பகுதியில் உள்ள ஆதிகேயா (Adygeya) மாகாணத்தில் உக்ரைன் நடத்திய ட்ரோன் தாக்குதல் பெரும் பரபரப்பை ஏற்படுத்தியுள்ளது. செவ்வாய்க்கிழமை மாலை, நோவாயா ஆதிகேயா கிராமத்தில் உள்ள அடுக்குமாடி குடியிருப்பு ஒன்றின் மீது உக்ரைனின் ஆளில்லா விமானம் (UAV) மோதி வெடித்தது. இந்த திடீர் தாக்குதலால் அந்தப் பகுதியே போர்க்களம் போல காட்சியளித்தது.
இந்தத் தாக்குதலின் விளைவாக அடுக்குமாடி குடியிருப்பில் பெரும் தீ விபத்து ஏற்பட்டது. இதில் 11 பேர் காயமடைந்துள்ளதாகவும், அவர்களில் இரண்டு பேர் சிறுவர்கள் என்றும் அந்த பிராந்தியத்தின் ஆளுநர் முராத் கும்பிலோவ் தெரிவித்துள்ளார். தாக்குதல் நடந்த அடுக்குமாடி குடியிருப்பின் முன்பகுதி பலத்த சேதமடைந்துள்ளதுடன், அங்கிருந்த பல பால்கனிகள் தரைமட்டமாகின. காயமடைந்தவர்கள் உடனடியாக மீட்கப்பட்டு அருகில் உள்ள மருத்துவமனைகளில் சிகிச்சைக்காக அனுமதிக்கப்பட்டுள்ளனர்.
சமூக வலைதளங்களில் வெளியாகியுள்ள அதிர்ச்சியூட்டும் வீடியோக்களில், குடியிருப்பின் அருகே நிறுத்தப்பட்டிருந்த சுமார் 20-க்கும் மேற்பட்ட வாகனங்கள் தீப்பிடித்து எரிவது பதிவாகியுள்ளது. தாக்குதலின் போது பலத்த வெடிச்சத்தம் கேட்டதாக நேரில் பார்த்தவர்கள் பீதியுடன் தெரிவித்துள்ளனர். குறைந்தபட்சம் 12 அடுக்குமாடி வீடுகள் இந்தத் தாக்குதலால் வசிக்க முடியாத அளவிற்குச் சேதமடைந்துள்ளதாகத் தகவல்கள் தெரிவிக்கின்றன. தீயணைப்பு வீரர்கள் பல மணி நேரம் போராடி தீயைக் கட்டுக்குள் கொண்டு வந்தனர்.
ரஷ்ய பாதுகாப்பு அமைச்சகம் வெளியிட்டுள்ள அறிக்கையின்படி, செவ்வாய்க்கிழமை மாலை மட்டும் ரஷ்ய வான்பரப்பிற்குள் ஊடுருவ முயன்ற 53 உக்ரைனிய ட்ரோன்களை ரஷ்யப் படைகள் சுட்டு வீழ்த்தியுள்ளன. இதில் ஆதிகேயா மாகாணத்தை ஒட்டியுள்ள கிராஸ்னோடர் (Krasnodar) பகுதியில் மட்டும் 7 ட்ரோன்கள் இடைமறிக்கப்பட்டுள்ளன. இருப்பினும், ஒரு ட்ரோன் குடியிருப்புப் பகுதியைத் தாக்கியது ரஷ்யாவின் வான் பாதுகாப்பு குறித்த கேள்விகளை எழுப்பியுள்ளது.
சமீபகாலமாக உக்ரைன் எல்லை தாண்டி ரஷ்யாவின் மக்கள் நடமாட்டம் மிகுந்த பகுதிகள் மற்றும் எண்ணெய் சுத்திகரிப்பு நிலையங்கள் மீது இத்தகைய ட்ரோன் தாக்குதல்களைத் தீவிரப்படுத்தி வருகிறது. இதற்குப் பதிலடியாக ரஷ்யாவும் உக்ரைனின் மின்சாரம் மற்றும் உள்கட்டமைப்புகள் மீது ஏவுகணைத் தாக்குதல்களை நடத்தி வருகிறது. இந்தத் தொடர் மோதல்களால் இரு நாடுகளிலும் அப்பாவிப் பொதுமக்கள் தொடர்ந்து பாதிக்கப்பட்டு வருவது உலக நாடுகளிடையே கவலையை ஏற்படுத்தியுள்ளது.
