அமெரிக்கா - ஈரான் போர்: இன்று வெள்ளிக்கிழமை என்ன நடந்தது?
ஓமான் கடற்கரைக்கு அப்பால் ஒரு எண்ணெய்க் கப்பல் அடையாளம் தெரியாத எறிபொருள் ஒன்றால் தாக்கப்பட்டதாக ஐக்கிய ராஜ்ஜிய கடல்சார் வர்த்தக நடவடிக்கைகள் (UKMTO) வெள்ளிக்கிழமை அன்று தெரிவித்துள்ளது.
ஓமானின் கசாப் நகருக்குக் கிழக்கே 19 கடல் மைல்கள் (35 கிலோமீட்டர்) தொலைவில் கப்பல் சென்றுகொண்டிருந்தபோது அது தாக்கப்பட்டது என்று UKMTO தெரிவித்தது.
இந்தச் சம்பவத்தால் கப்பலின் இடது பக்கத்தில் சிறு கட்டமைப்புச் சேதம் ஏற்பட்டதாகவும், அனைத்துப் பணியாளர்களும் பாதுகாப்பாக இருப்பதாகவும் அந்த அமைப்பு தெரிவித்துள்ளது.
சுற்றுச்சூழல் பாதிப்பு எதுவும் பதிவாகவில்லை என பிரிட்டிஷ் முகமை மேலும் தெரிவித்தது.
ஜூன் 22 முதல் நடந்த அமெரிக்கத் தாக்குதல்களில் 38 பேர் உயிரிழந்ததாகவும், 400க்கும் மேற்பட்டோர் காயமடைந்ததாகவும் ஈரான் தெரிவித்துள்ளது.
ஹோர்முஸ் ஜலசந்தியின் கட்டுப்பாட்டிற்காக அமெரிக்காவுடன் கடந்த மாதம் மீண்டும் தொடங்கிய சண்டையிலிருந்து, குறைந்தது 38 பேர் உயிரிழந்துள்ளதாகவும், 400-க்கும் மேற்பட்டோர் காயமடைந்துள்ளதாகவும் ஈரானின் சுகாதார அமைச்சகம் வெள்ளிக்கிழமை அறிவித்தது.
ஜூன் 22 முதல் அமெரிக்கத் தாக்குதல்களால் காயமடைந்தவர்களின் எண்ணிக்கை 400-ஐத் தாண்டியுள்ளது. மேலும் 38 சக நாட்டு மக்கள் வீரமரணம் அடைந்துள்ளனர் என்று தெஹ்ரானின் சுகாதார அமைச்சக செய்தித் தொடர்பாளர் ஹொசைன் கெர்மன்பூர் எக்ஸ் தளத்தில் எழுதியுள்ளார்.
அவர்களில், காயமடைந்த 22 பெண்களும்,வீரமரணம் அடைந்த மூன்று பெண்களும், 18 வயதுக்குட்பட்ட காயமடைந்த ஒன்பது பேரும், வீரமரணம் அடைந்த 18 வயதுக்குட்பட்ட ஒருவரும் அடங்குவர் என்று அவர் மேலும் கூறினார்.
சீனாவும் பாகிஸ்தானும் போர் நிறுத்தத்தையும், அமெரிக்க-ஈரான் பேச்சுவார்த்தைகளை மீண்டும் தொடங்கவும் வலியுறுத்தியுள்ளன
சீனாவும் பாகிஸ்தானும் போர் நிறுத்தம் மற்றும் அமெரிக்காவுக்கும் ஈரானுக்கும் இடையிலான பேச்சுவார்த்தையை மீண்டும் தொடங்குமாறு அழைப்பு விடுத்துள்ளன.
ஷாங்காயில் அமைச்சர்கள் சந்தித்த பின்னர், சீன வெளியுறவு அமைச்சர் வாங் யீ மற்றும் அவரது இஸ்லாமாபாத் சகா இஷாக் டார் ஆகியோர் கூட்டாக, தற்போதைய நிலைமை மோசமடைந்து வருவது குறித்து கவலை தெரிவித்ததோடு, சம்பந்தப்பட்ட தரப்பினர் உடனடியாகப் போர் நிறுத்தத்தை மேற்கொண்டு பேச்சுவார்த்தைக்குத் திரும்ப வேண்டும் என்றும் அழைப்பு விடுத்தனர் என சீன வெளியுறவு அமைச்சகம் ஒரு அறிக்கையில் தெரிவித்துள்ளது.
இந்த ஒப்பந்தம் கடுமையாகப் போராடிப் பெறப்பட்டது என்று கூறிய வாங், அமைதி நம் கண்முன்னே உள்ளது, கடைசித் தடையில் நாம் வீழ்ந்துவிடக் கூடாது அதிலும் குறிப்பாக நாம் பெற்றதை இழந்துவிடக் கூடாது என்றும் மேலும் கூறினார்.
ஈரானிலும் பரந்த மத்திய கிழக்கிலும் பல மாதங்களாக நீடித்து வரும் போரில் சீனாவும் பாகிஸ்தானும் மத்தியஸ்தம் செய்து வருகின்றன.
அமெரிக்காவின் புதிய தாக்குதல்களில் ஈரானின் சாபஹார் துறைமுகத்தில் உள்ள கோபுரம் சேதமடைந்ததாகத் தெரிகிறது
இன்ற வெள்ளிக்கிழமை அமெரிக்கா நடத்திய தாக்குதல்களில், ஓமான் வளைகுடாவில் உள்ள ஈரானின் முக்கிய துறைமுகமான சாபஹாரில் ஒரு கோபுரம் இடிந்து விழுந்ததாகத் தெரிகிறது.
அமெரிக்க பாதுகாப்புச் செயலாளர் பீட் ஹெக்ஸெத், தரையை நோக்கிச் சாய்ந்திருக்கும் ஒரு கண்காணிப்புக் கோபுரத்தையும், அதைச் சூழ்ந்திருக்கும் அடர்த்தியான சாம்பல் நிறப் புகையையும் காட்டுவதாகக் கூறப்படும் ஒரு புகைப்படத்தைப் பகிர்ந்தார்.
ஈரானின் நிலத்தால் சூழப்பட்ட அண்டை நாடான ஆப்கானிஸ்தானுக்கு சாபஹார் துறைமுகம் ஒரு முக்கியமான வர்த்தகப் பாதையாகும், மேலும் இது இந்தியாவின் ஆதரவுடன் இயங்கி வந்தது.
அந்த வளாகம் தொடர்ச்சியான அமெரிக்கத் தாக்குதல்களைச் சந்தித்துள்ளது.
சிரியாவில் உள்ள அமெரிக்க இராணுவத் தளம் மீதான தாக்குதலுக்கு ஈரான் பொறுப்பேற்றுள்ளது
ஈரான்ஷாஹரில் ஈரானியப் படைகள் கொல்லப்பட்டதற்குப் பதிலடியாக, சிரியாவின் அல்-தான்ஃபில் உள்ள அமெரிக்க சிறப்பு நடவடிக்கைக் கட்டளை மையத்தைத் தாக்கியதாக ஈரானின் இஸ்லாமியப் புரட்சிகரப் பாதுகாப்புப் படை (IRGC) வெள்ளிக்கிழமை கூறியதாக , தெஹ்ரானின் அரசு ஊடகங்கள் செய்தி வெளியிட்டுள்ளன.
"ஈரான்ஷாஹரில் வீரமரணம் அடைந்த ஈரானிய வீரர்களின் இரத்தத்திற்குப் பழிவாங்கும் விதமாக, சிரியாவின் அல்-தான்ஃப் பகுதியில் உள்ள எதிரியின் சிறப்பு நடவடிக்கைக் கட்டளை மையம் மீது திடீர் தாக்குதல் நடத்தப்படும் என ஐ.ஆர்.ஜி.சி அறிவித்துள்ளது," என அரசு ஒளிபரப்பு நிறுவனமான தஸ்னிம் டெலிகிராமில் பதிவிட்டுள்ளது.
சிரிய அரசாங்கத்திடமிருந்தோ அல்லது அமெரிக்க இராணுவத்திடமிருந்தோ உடனடியாக எந்த அறிக்கையும் வெளியாகவில்லை.
தனது அண்டை நாடுகளான லெபனான் மற்றும் ஈராக்கையும் சூழ்ந்துள்ள மத்திய கிழக்கு போரில் இழுக்கப்படுவதை சிரியா தவிர்க்க முயன்று வருகிறது.
சிரியா, ஜோர்டான் மற்றும் ஈராக் ஆகிய நாடுகளின் எல்லைகள் சங்கமிக்கும் இடத்தில் அமைந்துள்ள அல்-தான்ஃப் தளத்திலிருந்து தனது படைகளை முழுமையாக விலக்கிக் கொண்டதாக அமெரிக்க இராணுவம் பிப்ரவரி மாதம் அறிவித்தது.
ஈரானிய பாலங்கள் மீதான அமெரிக்கத் தாக்குதலில் ஏழு பேர் உயிரிழந்ததாக அந்நாட்டு ஊடகங்கள் தெரிவிக்கின்றன.
தெற்கு ஈரானிய துறைமுக நகரமான பந்தர் கமீரில் உள்ள பாலங்கள் மீது அமெரிக்கா நடத்திய வான்வழித் தாக்குதல்களில் குறைந்தது ஏழு பேர் கொல்லப்பட்டதாக ஈரானின் அரசு செய்தி நிறுவனமான ஐஆர்என்ஏ தெரிவித்துள்ளது.
பாலங்கள் மற்றும் பிற முக்கிய வசதிகள் தாக்கப்படலாம் என அதிபர் டோனல்ட் டிரம்ப் எச்சரித்ததைத் தொடர்ந்து, அமெரிக்கப் படைகள் உள்கட்டமைப்புகளை அதிகளவில் குறிவைப்பதால், இந்தத் தாக்குதல்கள் ஈரானுக்கு எதிரான அமெரிக்க இராணுவ நடவடிக்கையின் விரிவாக்கத்தைக் குறிக்கின்றன.
தனது சமீபத்திய இரவு நேர நடவடிக்கையின்போது டஜன் கணக்கான இலக்குகளைத் தாக்கியதாக அமெரிக்க மத்திய கட்டளைப் பிரிவு தெரிவித்துள்ளது. இது அமெரிக்கத் தாக்குதல்களின் தொடர்ச்சியான ஆறாவது இரவாகும். தெஹ்ரானுக்கு அருகிலும் செம்னான் மாகாணத்திலும் தாக்குதல்கள் நடந்ததாக ஈரானிய ஊடகங்களும் செய்தி வெளியிட்டுள்ளன.
இதற்கிடையில், வளைகுடாவில் உள்ள அமெரிக்காவுடன் கூட்டணி வைத்துள்ள நாடுகள் மீது ஈரான் புதிய ஏவுகணைத் தாக்குதல்களை நடத்தியது . வரும் ஏவுகணைகளை வான் பாதுகாப்புப் படைகள் இடைமறித்த நிலையில், கத்தார் இரண்டு முறை மக்களைப் பாதுகாப்பான இடங்களுக்குச் செல்லுமாறு வலியுறுத்தியது மேலும், சிதறி விழுந்த பாகங்களால் ஒரு குழந்தை காயமடைந்ததாக அதிகாரிகள் தெரிவித்தனர்.
ஈரான் மீதான சமீபத்திய தாக்குதல்களை நிறைவு செய்ததாக அமெரிக்க ராணுவம் தெரிவித்துள்ளது
ஈரானுக்கு எதிரான தனது சமீபத்திய பெரும் தாக்குதல் கட்டத்தை வெள்ளிக்கிழமை அன்று நிறைவு செய்ததாக அமெரிக்க மத்திய கட்டளைப் பிரிவு (சென்ட்காம்) அறிவித்தது .
முன்னதாக, அமெரிக்கா ஈரான் மீது தொடர்ச்சியாக ஆறாவது இரவாகத் தாக்குதல்களை நடத்தியிருந்தது.
போர் விமானங்கள், ஆளில்லா விமானங்கள் மற்றும் போர்க்கப்பல்கள் உள்ளிட்ட அமெரிக்கப் படைகள், துல்லியமான ஆயுதங்களை ஏவி, கடலோரக் கண்காணிப்பு மற்றும் வான் பாதுகாப்புத் தளங்கள், இராணுவ தளவாட உள்கட்டமைப்பு மற்றும் கடல்சார் திறன்கள் போன்ற டஜன் கணக்கான ஈரானிய இராணுவ இலக்குகளை தாக்கியுள்ளதாக சென்ட்காம் வெள்ளிக்கிழமை வெளியிட்ட அறிக்கையில் தெரிவிக்கப்பட்டுள்ளது.
சென்ட்காம் ஈரானின் இராணுவத் திறன்களை மேலும் சீர்குலைத்து வருவதுடன், வர்த்தகக் கப்பல்கள் மீதான சமீபத்திய தாக்குதல்களுக்கு ஈரானைப் பொறுப்பேற்கச் செய்கிறது என்று அந்த அறிக்கை மேலும் கூறியது.
ஈரான் தாக்குதலுக்கு மத்தியில் குவைத் தனது வான் பாதுகாப்பு அமைப்புகளைச் செயல்படுத்தியது
ஈரானின் ஏவுகணை மற்றும் ஆளில்லா விமானத் தாக்குதல்களை முறியடிப்பதில் குவைத்தின் வான் பாதுகாப்புப் படைகள் மீண்டும் ஈடுபட்டதாக குவைத் இராணுவம் வெள்ளிக்கிழமை தெரிவித்தது.
அந்நாட்டில் கேட்ட வெடிப்புச் சத்தங்கள், சமீபத்திய வான்வழித் தாக்குதல்களை அதன் வான் பாதுகாப்பு அமைப்புகள் இடைமறித்ததன் விளைவாக ஏற்பட்டவை என்று குவைத் இராணுவத்தின் பொதுப் பணியாளர் தலைமையகம் வெளியிட்டுள்ள அறிக்கையில் கூறப்பட்டுள்ளது.
கத்தாரின் தோஹாவில் வெடிச்சத்தம் கேட்டது
அண்டை மத்திய கிழக்கு நாடுகளில் உள்ள அமெரிக்க இராணுவத் தளங்களை ஈரான் குறிவைத்துள்ள நிலையில், கத்தார் தலைநகர் தோஹாவில் பல வெடிச்சத்தங்கள் கேட்டதாக வெள்ளிக்கிழமை அதிகாலை செய்திகள் தெரிவித்தன.
கைபேசிகளில் அரசாங்கத்தின் பாதுகாப்பு எச்சரிக்கை ஒலித்து, மக்களைப் பாதுகாப்பான இடங்களுக்குச் செல்லுமாறு கேட்டுக்கொண்டதுடன், பாதுகாப்பு அச்சுறுத்தலின் அளவு உயர்ந்துள்ளது என்றும் எச்சரித்தது.
குண்டுவெடிப்புகள் குறித்த செய்திகளைத் தொடர்ந்து, கத்தாரின் பாதுகாப்பு அமைச்சகம் வெளியிட்ட அறிக்கையில், அந்நாட்டின் ஆயுதப் படைகள் ஒரு ஏவுகணைத் தாக்குதலை இடைமறித்து என்று கூறியுள்ளது.
Weniger anzeigen
