மாத்தறையில் இருந்து வவுனியா நோக்கி பயணித்த ரஜரட்ட ரெஜின புகையிரதமும் கண்டியிலிருந்து மாத்தறை நோக்கி பயணித்த 872 ஆம் இலக்க கடுகதி புகையிரதமும் கிந்தோட்டை தர்மபால பாடசாலை அருகே ஒரே தண்டவாளத்தில்
பயணித்ததால் நேற்று பாரிய விபத்தொன்று ஏற்பட இருந்தது.
எனினும் இரு ரயில்களுக்கும் சுமார் 10 அடி மட்டுமே தூரம் இருந்த நிலையில் நிறுத்தப்பட்டதால் இந்த பாரிய விபத்து மயிரிழையில் தவிர்க்கப்பட்டது.
ஒரு ரயில் முன்கூட்டியே வருவதை அவதானித்துள்ள ரயில்வே கடவை ஒன்றின் ஊழியர் ஒருவர் தூரத்தில் இருந்தே
சத்தமிட்டவாறு சிவப்புக் கொடியை அசைத்ததினால் இரு ரயில்களும் நிறுத்தப்பட்டு விபத்து தவிர்க்கப்பட்டுள்ளது.
இவ்விரு ரயில்களும் கிந்தோட்டையில் தண்டவாளம் மாற வேண்டியிருந்த நிலையிலேயே ஒரு ரயில் சமிக்ஞைகளை பொருட்படுத்தாது பயணித்தமையே இந்த நிலைமை ஏற்படக் காரணம் என ஆரம்பகட்ட விசாரணைகளில் தெரிய
வந்துள்ளது.
இந் நிலையில் இந்த சம்பவம் தொடர்பில் விசாரணைச் செய்ய மூவர் கொண்ட குழுவொன்றினை ரயில்வே திணைக்களம் நியமித்துள்ளது. கண்டியில் இருந்து மாத்தறை நோக்கி பயணித்த கடுகதி புகையிரதம் சமிக்ஞைகளை
பொருட்படுத்தாமையே இந்த விபத்து நிலைமை ஏற்பட காரணம் என தெரிவிக்கும் புகையிரத திணைக்களம் அது குறித்த மேலதிக விசாரணைகளுக்காக அந்த புகையிரதத்தின் சாரதி, உதவி சாரதி, கடவை காவலாளி மற்றும் உதவி கடவை காவலாளி ஆகியோரை பணி இடை நிறுத்தம் செய்துள்ளது.
