சர்வதேசப் பொறியமைவின் மூலம் மட்டுமே தமிழர்களுக்கு நீதியினைப் பெறமுடியும் !!
சரணடைந்த ஆயிரக்கணக்கான தமிழர்கள் இப்போது உயிருடன் இல்லை என்ற சிறீலங்காப் பிரதமர் ரணில் விக்ரமசிங்கவின் கூற்றினைத் தெளிவுபடுத்தும்படி கோரியுள்ள நாடுகடந்த தமிழீழ அரசாங்கம், சர்வதேசக் குற்றவியல் நீதிமன்றம் போன்ற ஒரு சர்வதேசப் பொறியமைவின் மூலம் மட்டுமே தமிழர்கள் நீதியைப் பெறமுடியும் எனத் மீள வலியுறுத்தியுள்ளது.
கடந்த தைப் பொங்கலன்று யாழ்ப்பாணத்தில் இடம்பெற்றிருந்த பொங்கல் நிகழ்வொன்றின் போது சிறீலங்காப் பிரதமர் ரணில் விக்ரமசிங்க அவர்கள் சிறிலங்காவின் பாதுகாப்புப் படைகளிடம் சரணடைந்த ஆயிரக்கணக்கான தமிழர்கள் தற்போது எவரும் உயிருடன் இல்லை எனத் தெரிவித்திருந்தார்.
இது தொடர்பில் நாடுகடந்த தமிழீழ அரசாங்கம் வெளியிட்டுள்ள செய்தியறிக்கையொன்றில் மேலும் தெரிவிக்கப்பட்டுள்ளதாவது :
2009 மே மாதம் சிறீலங்கா பாதுகாப்புப் படைகளிடம் அமைதியான முறையில் சரணடைந்த தங்களுடைய உறவுகளின் கதி என்ன ஆயிற்று என்பது பற்றி இன்னும் ஏதுமறியாமல் இருக்கும் ஆயிரக்கணக்கான தமிழ்க் குடும்பங்கள் மத்தியில் பிரதமரின் இக்கருத்துக்கள் அதிர்ச்சி அலைகளை ஏற்படுத்தியுள்ளன. தாங்கள் பாதுகாக்கப்பட்டு, இறுதியாக விடுதலை செய்யப்படுவோம் என்ற வாக்குறுதிகளை நம்பி, போரின் இறுதியில் பாதுகாப்புப் படைகளின் கரங்களில் பெண்கள், குழந்தைகள் உள்ளிட்ட பெருந்தொகையான குடிமக்கள் தங்களை ஒப்படைத்தனர். அப்போதிருந்து இன்னும் ஆயிரக்கணக்கானோர் கைது செய்யப்பட்டதோடு தடயம் எதுவுமில்லாத அளவு காணாமலும் போயுள்ளனர்.
காணாமற்போனவர்களின் குடும்பங்களுக்கு, தங்களுடைய அன்புக்குரியவர்களுக்கு நடந்தவற்றின் முடிவு தெரியாதவிடத்து ‘உண்மையை அறிவதற்கான உரிமை’ இருக்கிறது என்பதைச் சர்வதேசச் சட்டம் அங்கீகரிக்கிறது. மேலும் கட்டாயமாகக் காணாமற்போகச் செய்யப்படும் குற்றத்திலிருந்து அனைத்து மக்களையும் பாதுகாப்பதற்கான சர்வதேச உடன்படிக்கையில் 2015 டிசம்பர் 15 அன்று சிறீலங்கா கையொப்பமிட்டுள்ளது. இந்த உடன்படிக்கையின் 21 வது பிரிவின்படி, காணாமற்போனவர்களின் குடும்பங்கள் தொடர்ந்து பாதிக்கப்படுவதை ஏற்றுக்கொள்வதோடு அவ்வாறு பாதிக்கப்பட்டவர்களுக்கு ‘காணாமற்போனவர்களுக்கு நடந்ததென்னவென்ற என்ற உண்மையை அறிந்துகொள்வதற்கான உரிமையையும்’ அளிக்கிறது.
பாதுகாப்புப் படைகளிடம் சரணடைந்த ஆயிரக் கணக்கானோர் இப்போது உயிருடன் இல்லை என்பதை எந்த அடிப்படையில் அவர் வெளியிட்டார் என்ற உண்மையைப் பகிரங்கமாக வெளியிடுமாறும், அவர்களுடைய உடல்கள் இருக்கும் இடத்தைப் பற்றிய திட்டவட்டமான தகவலை குடும்பங்களுக்குக் கொடுத்துதவுமாறும் நாடுகடந்த தமிழீழ அரசாங்கம் பிரதமர் விக்கிரமசிங்கவிடம் கடுமையாக வலியுறுத்துகிறது. அத்தகைய திட்டவட்டமான தகவலை அளிப்பதற்கு சிறீலங்கா அரசாங்கம் தொடர்ந்து தவறுமானால், அது காணாமற்போனவர்களின் குடும்பங்களின் துன்பத்தை நீடிக்கச் செய்வதோடு, அவர்களது மனித உரிமைகள் மீறப்படும் குற்றத்தையும், சர்வதேச சட்டத்தின்கீழ் பல்வேறு கடப்பாடுகளிலிருந்தும், மனித உரிமைகள் பேராயத் தீர்மானம்A/HRC/RES/31/1 (15 அக்டோபர் 2015) முன்வைத்த கடப்பாடுகளிலிருந்தும் தவறிவருவதை உள்ளடக்கியதாக இருக்கும்.
புதிதாகத் தெரிவிக்கப்பட்டுள்ள இவ்வுண்மையின் மூலம் சர்வதேசக் குற்றவியல் நீதிமன்றம் போன்ற ஒரு சர்வதேசப் பொறியமைவின் மூலம் மட்டுமே தமிழர்கள் நீதியைப் பெறமுடியும் என்றும் சிறீலங்காவைச் சர்வதேச நீதிமன்றத்தின் முன்பு நிறுத்துமாறு ஐ.நா. மனித உரிமைகள் பேராயத்திடமும் ஐ.நா. பாதுகாப்புப் பேரவையிடமும் நாடுகடந்த தமிழீழ அரசாங்கம் வலியுறுத்தி வருவதையும் மீண்டும் உறுதிப்படுத்துகிறது.
பெருந்திரள் வன்கொடுமைகளை நிகழ்த்திய அதே பாதுகாப்புப் படைகள் தாம் தமிழர் பகுதிகளில் பெரும் எண்ணிக்கையில் இன்னும் நிறுத்தப்பட்டுள்ளன என்பது மிகவும் அதிர்ச்சிக்குரிய செய்தியாகும் என நாடுகடந்த தமிழீழ அரசாங்கத்தின் செய்தியறிக்கையில் தெரிவிக்கப்பட்டுள்ளது.
