தமிழீழம் நீண்ட தொலைவிலில்லை! இந்தியாவின் முன்னாள் வெளியுறவு அமைச்சர் தெரிவிப்பு
தமிழீழம் நீண்ட தொலைவிலில்லை' என பாரதிய ஜனதாக் கட்சியின் மூத்த உறுப்பினரும் இந்தியாவின் முன்னாள் வெளியுறவு அமைச்சருமான ஜஸ்வந்த் சின்ஹா தனது கட்சியின் கூட்டம் ஒன்றில் அண்மையில் தெரிவித்துள்ளார்.
ஒன்றுபட்ட இலங்கைக்குள் தமிழ் மக்களுக்கான அரசியற் தீர்வை எட்டுதல் தொடர்பாக பாரதிய ஜனதாக் கட்சியின் ஒன்றுகூடலில் விவாதிக்கப்பட்ட போது, தற்போது இந்த நிலை வேறுபட்டுள்ளது என்பதை ஜஸ்வந்த் சின்ஹா வலியுறுத்தியுள்ளார்.
ஈழம் என்பது மிகக் கிட்டிய தூரத்தில் உள்ளது. தற்போது பங்களாதேஷ் சுதந்திர நாடாக மாறிவிட்டது. இதேபோன்று வடசூடான் மற்றும் தென்சூடான் ஆகியனவும் தற்போது சுதந்திரமடைந்துவிட்டன" என ஜஸ்வந்த் சின்ஹா தனது விவாதத்தின் போது சுட்டிக்காட்டியுள்ளார்.
தனது உரையின் போது, கச்சதீவை இந்தியா மீண்டும் தனக்குச் சொந்தமாக்க வேண்டும் எனவும் இதன்மூலம் இந்திய மீனவர்களின் மீன்பிடி உரிமைகள் நிச்சயப்படுத்தப்பட்டு அவர்களுக்கான மீன்பிடி எல்லைகள் மீளவரையறுக்கப்பட முடியும் எனவும் இலங்கை கடற்படையால் இந்திய மீனவர்கள் படுகொலை செய்யப்படுவது தடுக்கப்பட முடியும் எனவும் பாரதிய ஜனதாக் கட்சியின் மூத்த உறுப்பினர் ஜஸ்வந்த் சின்ஹா சுட்டிக்காட்டியுள்ளார்.
கச்சதீவை நாம் மீளப்பெற்றால் எமது மீனவர்கள் பாதிக்கப்பட மாட்டார்கள். இதன்மூலம் இந்தியக் கடற்பரப்பை நாங்கள் கட்டுப்படுத்த முடியும்" எனவும் இவர் மேலும் குறிப்பிட்டுள்ளார்.
எமது மீனவர்கள் படுகொலை செய்யப்படுவது தொடர்பில் இனியும் பொறுத்துக் கொள்ள முடியாது என இந்தியா இலங்கையிடம் கூறவேண்டும்.
இந்தியாவின் தற்போதைய வெளியுறவுக் கொள்கையானது குழப்பமானதாக உள்ளது. நாட்டின் எதிர்காலம், அதிகாரம் மற்றும் உறுதித்தன்மை போன்றன ஆபத்திற்கு உள்ளாகலாம்.
தற்போது இந்தியாவை ஆளும் அரசாங்கமும் பிரதமரும் பலவீனமானவர்களாக இருக்கலாம். ஆனால் இந்திய மக்கள் பலவீனமானவர்கள் அல்ல" என ஜஸ்வந்த் சின்ஹா மேலும் குறிப்பிட்டுள்ளார்.
எமது அயல்நாடான இலங்கையின் வடக்கில் இடம்பெற்ற இனப்படுகொலைகளுக்கு சோனியா காந்தியும் மன்மோகன் சிங்கும் தான் பொறுப்பு என்பதை மக்களிடம் வீடுவீடாகச் சென்று எடுத்துக்கூற வேண்டும் எனவும் தனது உரையின் போது முன்னாள் வெளியுறவு அமைச்சர் ஜஸ்வந்த் சின்ஹா வலியுறுத்தினார்.
